Наурыз мерекесі – көктемгі жаңарудың белгісін көрсететін, ұлт пен ұлыстың сағынып күтетін ортақ мерекесі. Елімізді мекендеген бүкіл халық Наурызды «Жыл басы» деп танып, жыл өткен сайын Ұлыстың ұлы күнін ерекше сән-салтанатпен қарсы алады.

Осы орайда, Наурыз мейрамдарын тойлауға бағытталған «Наурызнама» тұжырымдамасына сәйкес, Ақтөбе облысының мемлекеттік архивінің ұжымы 20 наурыз күні – ата-бабамыздың, ұрпақтан-ұрпаққа жалғасып келе жатқан ұлттық құндылығымызды, әдет-ғұрыптарымызды жоғалтпай ерекше мән беріп Наурыз мерекесін атап өтті.

Наурыз мейрамын мерекелеу қарсаңында  «Нұр себеле – Наурыз» атты іс-шара ұйымдастырылды. Ұжым қызметкерлері арасында «Тоғызқұмалақ», «Асық ату», «Бес асық», «Арқан тартыс», «Қол күрес», «Гір көтеру» сынды спорттық ойындар ойнатылып, ұлттық киім үлгісі насихатталып, ыстық бауырсақ пен дәмді көжеден ауыз тиіп, бір-біріне көтеріңкі көңіл-күй сыйлады.
Шара барысында Ақтөбе облысының мемлекеттік архивінің тұрақты зерттеушісі, танымал өлкетанушы, жазушы «Ойыл» энциклопедиясы, «Шығанақ», «Уил. Годы войны», «Ойыл. История в архивных документах»  кітаптарының авторы Нұрлан Жұмағалиев ұжым қызметкерлерін Наурыз мейрамымен құттықтап, ақ тілектерін арнап,  батасын берді.